Die Selderysop Dieet Resep

Ek het heelwat versoeke vir die resep van die Selderysop-Dieet gekry. Om die eerlike waarheid te sê, het ek al van dié ene vergeet. Dit het noudiedag in ‘n gesprek opgekom en toe besluit ek om dit te gaan soek en bietjie te kyk hoe dit lyk.

Na bewering is die dieet vir ernstig-oorgewig mense by hospitale in die VSA gegee om vinnig gewig te verloor voor hartchirugie. Die idee is, omdat die sop uit negatiewe kalorieë bestaan, dit laag in vet en laag in koolhidrate is, jy soveel van die sop kan inneem as wat jy wil, veral as jy honger is. (Seker beter as daardie sjokolade, huh?) Maar dan ook, die groente in die sop is gesond, hoog in anti-oksidante, kan jou immuunstelsel ‘n hupstoot gee en kan jou energievlakke verhoog.

Aan die ander kant kan dit jou hoofpyn gee, lighoofdig, winderig en sommer net plein beduiweld maak.

Maar mense wat die dieet gevolg het, beweer dat hulle 5-10kg per week verloor het. Minder as jy kroek, en meer as jy oefen. Dié dieet sal verseker enige dieetkundige se hare sal laat rys, want hulle sal dadelik vir jou sê dat dit nie volhoubaar is nie, en dat jy die gewig vinniger gaan optel as wat jy dit afgeval het. Maar vir ‘n vinnige oplossing vir ‘n spesiale geleentheid mag dit dalk net werk…

En omdat ek een van daardie mense is wat ‘n dieet nodig het, maar nog nooit werklik by een kon hou nie – gaan ek die resep vir julle gee en nie ‘n woord verder sê nie…

*** As enige van julle die dieet gaan volg, laat weet bietjie hoe dit gegaan het en hoeveel gewig julle verloor het.

(En onthou, as jy enige mediese probleme het of onseker voel, is dit beter om maar eerder met jou dokter of dieetkundige te gesels voordat jy enige dieet volg.)

Die Sop Resep

900 g tamaties
6 groot uie
1 bondel seldery
2 x 410g blikke groenboontjies
1,5 kg wortels
2 biefaftrekselblokkies
1 pakkie wit uiesop

Doop die tamaties in kookwater sodat die skilletjies maklik kan afkom. Skil en kap die groente in blokkies, plaas in ‘n gróót kastrol en bedek met water. Gooi die aftrekselblokkies en soppoeier in en kook vinnig vir 10 minute. Verlaag dan die hitte en prut tot die groente sag is.
Geur met sout, peper, kruie en spesery na smaak.
As jy van ‘n “chunky” sop hou, kan jy dit net so gebruik, maar andersins kan jy dit fynmaak met ‘n stick blender of in ‘n versapper.
Dit maak ‘n groot hoeveelheid sop, so sorg dat jy spasie in jou vrieskas het!

Die Dieet

Die idee met die dieet is dat jy soveel sop kan eet as wat jy wil, veral as jy honger is. Dan ook :

DAG EEN –
Eet soveel sop en vars vrugte as wat jy wil, maar GEEN piesangs.

DAG TWEE –
Eet soveel sop en groente (rou of gestoom) as wat jy wil, maar GEEN ertjies, boontjies of mielies.
Beloon jouself met ‘n lekker groot gebakte aartappel met ‘n klont margarien bo-op.

DAG DRIE –
Eet soveel sop, vrugte en groente as wat jy wil, maar GEEN piesangs en aartappels.

DAG VIER –
Eet soveel sop as wat jy wil, en ‘n maksimum van 6 piesangs.
Drink soveel vetvrye melk as wat jy wil.

DAG 5 –
Eet soveel sop as wat jy wil, 500 g beesvleis of vis en 6 ryp tamaties.
Drink ten minste 6 glase water op hierdie dag.
Jy kan die beesvleis vervang met hoender.

DAG 6 –
Eet soveel sop, beesvleis en groente as wat jy wil, maar GEEN aartappels.

DAG 7 –
Eet soveel sop, bruinrys en groente as wat jy wil.
Drink onversoete vrugtesap.

Die Reëls –
Geen brood
Geen alkohol
Geen dieetkoeldrank
Drink 6-8 glase water
Neem ‘n multivitamien
Probeer koffie vermy, maar as jy moet – kafeïenvry
Drink eerder rooibos, groen- of kruietee d
Drink tee en koffie met vetvrye melk.
Jy kan onversoete vrugtesap drink, maar dan moet dit 1 deel vrugtesap verdun met 4 dele water wees.
Oefen ! Oefen ! Oefen !